PAMASU-MASUON PARBAGASON GKPA

PAMASU-MASUON PARBAGASON GKPA

1.                  ENDE :

2.                  VOTUM:

Dibagasan goar ni Debata : Ama dohot AnakNa Tuhan Jesus Kristus dohot Tondi Parbadia na manompa langit dohot tano on, Amen !

         ( Diise sada ayat sian na di toru on )

1.                   Martua ma halak na mabiar mida Tuhan, jana na mangolu mangihutkon parentaNa. (Masmur 128:1).

2.                   Haporsayai ma Tuhan sian sude rohamu, jana ulang pangasahon pangartianmu sandiri. Ingot ma Tuhan di bagasan sude na nikarejohonmu, anso dipatuduhon la tu ho dalan parngoluon na sintong. (Poda: 3:5-6).

3.                   Debata do arop ni rohamunu. Sai digohi la ma rohamunu dohot jop ni roha bope dohot hasonangan di bagasan haporsayaanmunu tu Sia, anso mur mararop roha hamu tu Debata baenon ni gogo ni Tondi Parbadia (Rom. 15.13).

4.                   Angka haputusan sibaenonmunu, tontuhon hamu ma i mardongan dame na nilehen ni Kristus tu bagasan rohamunu. Angke na nipiohon ni Debata do hamu gabe sada pamatang, anso mangolu hamu sian hadameon na sian Kristus i. (Kolose: 3: 15).

3.        TANGIANG

Ale Tuhan Debata Amanami na di banua ginjang! Ho do na mangaturkon pardongan saripeon i. Diida Ho do dongannami on na marsangkap giot marbagas, jana na ro do halahi mangido pasu-pasuMu, antong sai tatap ma halahi di bagasan asi ni rohaMu. Rajai ma halahi markitehite Tondi Parbadia, anso mamungka jana marujung di bagasan dame pardongansaripeon ni halahi. Tangihon ma tangiangnami on hara ni asi ni rohaMu, Amen.

4.        ENDE :

5.        JAMITA :

6.                  E N D E   :                                                                                        (Jongjong ma halahi na dua)

7.        SIPAINGOT :

Hamu angka na niparhamaol ni Debata, ditahi rohamunu do saonnari giot marbagas. Antong tangihon hamu ma jolo hata ni Debata, taringot tu ruhut ni pardongan saripeon ni halak Kristen.

Dung ditompa Debata jolma i didok Ibana ma : nada denggan sasada halaklahi i punjung. Hubaen ma di ibana sada dadaboru pangurupi na tumbuk baen donganna.

Tamba ni i didok Tuhan Jesus : Ganup na paulakkon dadaboruna ia so hara ni na markarosuan na mangalangkup do. Pangalangkup do dope na mambuat na sirang i. Antong na nipadomu ni Debata nada jadi sirangon ni jolma. Songon on do didok Debata tu halaklahi i : Haholongi hamu ma pardihutamunu be songon Kristus na mangkaholongi Pariagutan i, jana na mangalehen diriNa humophopsa. Ulang muruk hamu adop halahi, angkon marroha hamu mandongani halahi, jana sangap baen hamu halahi na gabe dongan panean di hangoluan na so ra mantak i.

Dung i songon on do didok hata ni Debata tu angka dadaboru : Dioloi angka dadaboru ma halaklahina be songon pangoloionna di Tuhan i. Dibaen halaklahi i do ulu ni dadaboru i, songon Kristus ulu ni Pariagutan i. Angkon tobok, hormat jana toman mardongan halambohon dohot hadameon ni tondi ma parange ni dadaboru i. I ma na arga di jolo ni Debata bope di jolo ni jolma.

Antong angka na mamarangehon hata ni Debata ma hamu, manyolukkon parasinirohaon dohot habasaron dohot na marserep ni roha ma hamu.

Marsipaune-unean ma hamu dohot marsiasi-asian. Sasude riting ni roha, muruk, rimas, panyonggahion dohot pangincahion i, dao ma i sian hamu. Tapi di ginjang ni sasudena i, marsihaholongan ma hamu, angke i do ruhut-ruhut ni na sun denggan i. Dung i dame na sian Debata, i ma na mangarajai rohamunu, jana sasude na nikarejohonmunu markitehite hata sanga pambaenan, tongtong ma i markitehite goar ni Tuhan Jesus Kristus, anso Ibana na mangarajai roha dohot karejomunu.

Antong madung dibege hamu hata ni Debata taringot tu ruhut ni pardongan saripeon i.

          Na manyapai ma au parjolo di ho, bayo pangoli si....................!

Ra do ho mangkajongjongkon di job ni Debata na umboto sasude, dohot di jolo ni angka dongan na lagut dison, na nipangido ni rohamu do si......................on gabe donganmu saripe ? Ra do ho mangkahoiongi ibana sian nasa rohamu dohot manyanhon sian nasa gogomu, di bagasan na mamarangehon parange na badia rap dohot ibana paboa halak Kristen ho ? Ra do ho manganju-anju ibana di hagaleonna sugari sura humurang parangena, jana na so tama paulahonmu ibana sanga tadingkononmu ibana lopus tu hamatean na manyirang hamu sogot ?

Muda na dung sada rohamu mangoloi sasudena i dok ma alusmu :

ALUSNA : Olo, na marpadan ma au !

Antong na manyapai ma au muse dohot di ho ale inang, si....................!

Ra do ho mangkajongjongkon di jolo ni Debata na umboto sasude dohot di jolo ni angka dongan na lagut dison, basa dipangido rohamu do si...................on gabe donganmu saripe ?

Ra do ho mangkahoiongi ibana sian nasa rohamu, dohot marpangalaho na ture maradophon ibana dohot marparangehon parange na badia ho rap dohot ibana, paboa halak Kristen ho ? Ra do ho manganju-anju ibana di hagaleonna sugari sura humurang parangena, jana na so tama mangilolong ho sanga tadingkononmu ibana, lopus tu hamatean na manyirang hamu sogot ?

Muda na dung sada do rohamu mangoloi sasudena i, dok ma alusmu !

ALUSNA : Olo, na marpadan ma au !

Antong  marsilehenan tangan siamun  ma hamu  paboa hot ni padanmunu.

Naposo ni Debata do au na mandok HataNa tu hamu !

Di bagasan Goar ni Debata : Ama, Anak dohot Tondi Parbadia do au mandok tu hamu : "Na nipadomu ni Debata nada jadi sirangon ni jolma".

( Marsilehenan tintin muda adong )                                                       (Marsinggang pengantin)

8.        PASU-PASU :

"Di pasu-pasu jana dijagahon Tuhan Debata ma hamu. Disondangkon jana diadopkon Tuhan Debata ma bohiNa tu hamu. Didongani jana dipargogoi ma hamu mangkangoiuhon parsaripeonmunu on di bagasan habadiaon, sian mulana lopus tu ujungna". Amen !

9.        TANGIANG :

         Martangiang ma hita !

Ale Tuhan Debata Amanami na di banua ginjang, tarimakasi ma hami sombahon tu adopanMu markitehite Jesus Kristus Tuhannami, dibaen madung dipatulus Ho dongannami on manjagit pasu-pasu parsaripeon i. Pargogoi jana togu-togu ma halahi mangkangoluhon parsaripeon ni halahi di bagasan dame dohot jop ni roha.

Ale Tuhan, dohot do hami na lagut dison marjop ni roha hara ni pamasu-masuon parsaripeon ni halahi. Di bagasan serep ni roha do hami ro mangido tu joloMu, anso Ho ma tongtong manjagahon dohot mamasu-masu sude parngoluonnami, anso tongtong marsangap jana marmulia Ho marhitehite ngolunami dohot parsaripeonnami be. Tangihon ma tangiangnami on di bagasan goar ni AnakMu Tuhan Jesus Kristus Tuhannami. Amen !

10.    E N D E   :                                                                 (Haul pamasu-masuon)

11.           TANGIANG :

Tapasahat ma haulta on tu Debata anso dipasupasu, martangiang ma hita ! Ale Debata Amanami na di banua ginjang, Ho do haroroan ni sude silehen-lehen na denggan dohot silua na sanggam.

Hami pasahat ma sian na nilehenMi tu hami gabe haulnami tu Ho, sai jagit ma i gabe uap na huskus di adopanMu. Pasu-pasu ma i jana jagahon, anso hami pargunahon haul on laho patimbulkon harajaanMu di tongatonga ni parlagutanMu dohot di portibi on. Sai ungkap ma rohanami markitehite TondiMu, anso mur hami tanda silehen-lehenMi tu hami, anso mur ringgas hami mandokkon tarimakasi tu Ho markitehite Jesus Kristus Tuhannami. Amen !

        

         Ale Amanami na di banua ginjang ............... dohot udutna.

12.    PASU-PASU

Di dongani asi ni roha ni Tuhan Jesus Kristus,

Dohot holong ni roha ni Debata Ama,

Dohot pardonganan ni Tondi Parbadia ma hamu. Amen !

Amen, Amen, Amen !                                                                                                                      ( Diendehon )

rasenaha'18