MANGHAJONGJONGKON HAPORSAYAAN GKPA

MANGHAJONGJONGKON HAPORSAYAAN GKPA

1.        E N D E :                             ( Jongjong ma tu jolo na giot malua jana simatobangna

                                                         jongjong di pudi ni halahi)

2.        SIPAINGOT     :         Hamu dongan sahaporsayaan dibagasan Goar ni Tuhanta Jesus Kristus !

Hatiha on jongjong do di jolonta angka dakdanak ni Parlagutan on na dung manjagit pandidion na badia hatiha dakdanak dope halahi. Di hatiha pandidion i, madung marpadan do simatobangna be laho manogu-nogu,marsuru tu Gareja dohot mangajari halahi di hata ni Debata. Saonnari madung jongjong halahi giot mangoku haporsayaanna, harana barang ise na mangoku dohot pamanganna basa Jesus do Tuhan, jana dihaporsayai rohana Debata na dung pangoluhon Tuhan Jesus sian angka na mate, gabe dapotan haluaon ma ibana. Harana markite roha do halak porsaya dohot dipatigor jana markite pamangan halak mangoku jana dipalua.

      

       Hamu ale natoras ni na giot mangoku haporsayaanna on !

          Diida hamu do dakdanakmunu, haholongari" ni rohamunu jongjong saonnari dison. Tama do hamu parjolo mandok tarimakasi tu Debata hara ni sude asi ni rohaNa na saidanna i, dibaen dipangolu halahi lopus tu sadari on, jana jabat dope diboto halahi hata ni Debata dohot dalan tu hangoluan i.

Tapi tama muse do ingotonmunu sadari on, angka pambaenanmunu na hurang tu dakdanakmunu on, dibaen nada dilehen Debata angka dakdanak on tu hamu anso adong donganmunu markarejo sajo, tapi anso ditogu-togu jana diajari hamu do halahi manghangoluhon hata ni Debata. Ditangiangkon hamu do dakdanakmunu on ganop ari na saidanna i anso ulang mago halahi ?

Muda   dihilala   hamu   saonnari   hurang   ni   pambaenanmunu   taringot   tu dakdanakmunu on, tama do unduk rohamunu tu Debata manopoti salamunu anso disesa la i.

Hamu angka dakdanak na nihaholongan ni Debata !

Na jongjong do hamu saonnari di jolo ni Debata na marnida torus tu bagasan rohamunu, dohot di adopan ni Parlagutan on dohot di jolo ni simatobangmunu be.

Madung diboto hamu lomo dohot sogo ni roha ni Debata na dung diguruhonmunu sahonokna on, asa nada tarbaen hamu be marsidalian sogot di ari paruhuman i. Jana muda diingot hamu angka pardalanan ni ngolumunu na dung salpu i, tama do mandok tarimakasi hamu tu Debata, hara ni asi ni rohaNa na manogu - nogu hamu. Jana muda diingot hamu angka pangalahomunu na so tama, ima nayang dohot jais ni rohamunu tu natorasmunu dohot sude dosamunu maradopkon Debata dohot donganmunu jolma tama do marsak be hamu mamingot i.

Oban hamu ma sudena i tu Tuhan Jesus anso disesa la i markite mudarNia na durus humophop pardosa na ra manopoti dosana. Jana pauba hamu ma rohamunu, jana pungka hamu ma marparange na imbaru sian sadarion lopus tu ujung na, anso mardalan hamu di dalan hasintongan i, na marhapatean tu hangoluan na so mantak.

3.        TANGIANG       : Antong martangiang ma hita !

Ale Tuhan Debata, Amanami na di banua ginjang, puji-pujian dohot tarimakasi godang ma hami sombahon tu adopanMu, di sude asi ni rohaMu na dung hami jagit dohot na dung manjagahon dakdanak on na saidanna i. Asi ma rohaMu jana jagit ma halahi gabe dakdanakMu, jana lehen ma Tondi Parbadia maringanan di roha ni halahi, anso gabe siseanMu halahi ro di salolot ni lolotna.

Sesa ma sude dosa dohot hahurangannami simatobang ni halahi anso ulang targasip halahi, jana ulang loas mago barang ise sian halahi , binaen ni pangalahonami i.

Ale Tuhan Jesus ! Sesa ma sude dosa ni dakdanak on maradophon Ho, bope maradophon simatobangna dohot donganna jolma, jana sai patulus ma karejo nanipungkaMi di hadirion ni halahi, jana togu-togu ma halahi sudena anso ulang adong na masuk tu hamagoan barang ise sian hami on, tapi anso dapotan hangoluan na so mantak hami di bagasan Tuhan Jesus Kristus Tuhannami. Amen.

4.        E N D E   :                                             (Juguk ma angka simatobang ni halahi)

5.                  SAPA-SAPA    :

Hamu na giot mangoku haporsayaan, alusi hamu ma hata na husapai on tu hamu di jolo ni Debata dohot di jolo ni Parlagutan on.

1.       Diparhatutu rohamu do hata ni Debata na niguruhonmunu na saidanna i, i do
dalan tu hangoluan ?

       Alusna : Diparhatutu rohangku do !

2.       Ra do ho sian nasa rohamu manadingkon sudena dosa, jana ra do ho tu
joloan on manghangoluhon Hata ni Debata na niguruhonmi lopus tu
hasusude ni bohalmu ?

       Alusna : Ra do au !

3.       Ra do ho manghangoluhon haporsayaan na sintong i, na nioku ni Parlagutan
Kristen Protestan songon na tarsurat di Padan na Honok dohot di Padan na
Imbaru ?

Alusna : Ra do au !

4.       Ra do ho manghaburjuhon manjagit pamunan na badia i, songon na
niaturkon ni Tuhan Jesus, jana ra do ho mandalankon sude kewajibanmu tu
Parlagutan i ?

       Alusna : Ra do au !

Antong na marpadan do hamu saonnari dohot Debata na badia i di jolo ni Parlagutan on dohot di jolo ni simatobangmunu. Ulang ma muba - uba rohamunu, jana sai burju ma hamu mandalankon pangokuaonmunu i, anso mur togu haporsayaanmunu.

6.        MANGOKU HAPORSAYAAN :

Antong oku hamu ma haporsayaanmunu, rap ma hamu mandok !
Ahu porsaya.............. dohot udutna.

7.        ENDE

8.        HATA SIPAINGOT:

         Antong ro ma hamu, paunduk hamu ma rohamunu be manjagit pasu-pasu sian Debata!

(ro ma mardua-dua haiak tu jolo)

Manise hata sipaingot, jana dijalang ma na giot mangoku haporsayaan i. Dungi di suru ma marsinggang)

9.        PASU-PASU:

"Dipasupasu Tuhan Debata, Ama dohot Anakna Tuhan Jesus Kristus dohot Tondi Parbadia ma ho ! Sai didongani ma ho maralohon sude na jat, jana dipargogoi ma ho patuiuskon sude na denggan i". Amen.

Hamu angka na hinaholongan ni Debata, na dung gabe dongan sa Parlagutan jana dongan sapanganan hamu mangankon Pamunan na Badia i. Na arga situtu do hamu ditobus, dibaen i ulang be oloi hamu dosa dohot sibolis. Dipargogoi jana didongani Debata do hamu maralohon pangago i, asal ma togu rohamunu tu Ibana, jana toguonNia do hamu masuk tu harajaan banua ginjang i.

10.    TANGIANG :     Martangiang ma hita !

Ale Tuhan Debata Amanami na di banua ginjang, ibo ma rohaMu di sude angka na dung marpadan tu Ho sadari on jana madung dipasu - pasu Ho halahi ! Sai togu-togu jana jagahon ma halahi markitehite Tondi Parbadia. Sai patogu ma roha ni halahi manghangoluhon padan na dung nioloan ni halahi. Sai parbadiai ma halahi dibagasan hataMu, anso tarida haporsayaan ni halahi tu joloan on na tongtong marpos ni roha di hataMu dohot marparange na denggan ! A m e n.

11.    E N D E   :                    ( Mulak ma na mangoku haporsayaan tu juguhanna be)

12.    TANGIANG PANUTUP :

rasenaha'18