TATA IBADAH PANDIDION DI GKPA

TATA IBADAH PANDIDION DI GKPA

Tata ibadah pandidion di GKPA adong pigapiga rumangna ima:

1. Pandidion tu dakdanak,

2. Pandidion tu namagodang,

3. Pandidion na hinipu (tompu), dohot

4. Pandidion tu ruas na marguru

Tata ibadah tu na opat pandidion on ima songon na di toru on.

1 PANDIDION TU DAKDANAK

1.                  E N D E    :                                                                                               (Jongjong natoras)

2.        MARTANGIANG  :

Ale Amanami na di banua ginjang ! Na ro do hami tu joloMu maroban dakdanak on, asa ni pandidihon. Sai asi ma rohaMu ! Jagit ma halahi gabe dakdanakMu ! Pasupasu jana dongani ma halahi salolot mangolu di tano on, jana pamasuk ma halahi tu harajaanMu markitehite Tuhan Jesus Kristus, Tuhannami.                                                                                        Amen!

3.        HATA SIPAINGOT:

Antong hamu angka dongan, na maroban dakdanak on, asa ni pandidihon, tangihon hamu ma hata ni Tuhan Jesus, na mandok : "Kehe ma hamu, podai hamu ma sandok bangso, didi hamu ma halahi tu bagasan goar ni Debata Ama, Anak dohot Tondi Parbadia ! Laing ajari hamu ma halahi patuluskon sandok hata na dung hutanohan tu hamu. Dung i, ligi ma sai dongananku do hamu ganop ah, lopus ro di hasidungan ni hasiangan on. Barang ise na porsaya jana ni pandidihon, dapotan hangoluan, tapi na so porsaya hona uhum do". "Adong ma na maroban angka dakdanak tu Tuhan Jesus asa dijama. Tapi dirarang anak siseanNa i ma na maroban i. Marnida i Tuhan Jesus muruk ma rohaNa, didok ma : Loas hamu ma ro angka dakdanak i tu Au, ulang rarang hamu halahi, dibaen di angka na songon i do Harajaan ni Debata ! Tutu do na hudok on tu hamu : Barang ise na so manjagit Harajaan ni Debata songon dakdanak on, nada masuk ia tusi. Dung i dihaol ma dakdanak i, diampehon ma tanganNa tu halahi, laho mamasu-masu".

4.        MANGOKU HAPORSAYAAN :

         Hamu natoras ni dakdanak on, oku hamu ma jolo haporsayaanta i, rap ma hamu mandok:

        

         Ahu porsaya ............ (dohot udutna)

5.        SAPA – SAPA : Antong alusi hamu ma hata na husapai on tu hamu :

1.   Dipangido hamu saonnari didion dakdanakmunu on tu bagasan ni na ni haporsayaanmunu ?

          Alusna : Dipangido rohanami!

2.       Na ra do hamu mamodai dakdanakmuriu on, anso diihutkon halahi hata ni
Debata !

       Alusna  :  Ra do hami

3.       Ra do hamu marsuru halahi tu gareja dohot tu parguruan ni Parlagutan Protestan, anso gabe ruas na mangolu halahi di Tuhan Jesus Kristus ?
Alusna : Na ra do hami

6.        PANDIDION  : Antong tapasahat ma halahi tu Debata markitehite pandidion na badia i.

Ale si......... ! Hudidi ma ho tu bagasan Goar ni Debata Ama dohot tu bagasan Goar ni AnakNa Tuhan Jesus Kristus dohot tu bagasan Goar ni Tondi Parbadia. Amen.

         ( Diampehon Pandita i ma tanganna tu ulu ni dakdanak huhut ma didok :)

Dipasu-pasu jana dijagahon Tuhan Debata ma ho, di hamamasukmon tu bagasan Harajaan ni Debata, olat ni on ro di salolot ni lolotna. Amen

7.        MARTANGIANG :

Ale Tuhan Debata, Amanami markitehite Tuhan Jesus Kristus Tuhannami. Madung hami pasahat angka dakdanak on tu Ho, jana dijagit Ho do halahi gabe dakdanakMu markitehite pandidion na badia k anso masuk halahi tu Parlagutan ni halak Kristen di tano on, jana gabe panean di hangoluan na salolot ni lolotna. Sai asi ma rohaMu dohot di angka natoras ni dakdanak on. Sai pargogoi jana ajari ma halahi manogunogu dakdanak on tu Ho, anso rap taruli halahi di arta ni harajaanMu. Amen !

8.        ENDE

9.        TANGIANG HAUL - ENDE HAUL :

10.    TANGIANG : Ale Amanami na di banua ginjang...........dohot udutna.

11.    PASU-PASU   :

Dipasupasu jana dijagahon Tuhan Debata ma ho ! Disondangkon Tuhan Debata ma bohiNa tu ho, jana asi ma rohaNa di ho. Diadopkon Tuhan Debata ma bohiNa tu ho, jana dipasaor ma dameNa tu tondimu.   Amen.

Amen ... Amen ... Amen...

2. PANDIDION TU NA MAGODANG

1.        ENDE

Hamu na nihaholongan ni Debata, madung dijagit hamu hata ni Debata, na dipodahon tu hamu. Tama do mandok tarimakasi hamu tu Debata sian nasa rohamunu hara ni sude asi ni rohaNa tu hamu. Dibaen diboto hamu saonnari nada pola mago be hamu hara ni dosamunu, muda porsaya hamu di panghopkop ni Tuhan Jesus Kristus.

Antong timbang hamu ma dibagasan rohamunu. Na ra do hamu saonnari manadingkon sude dosa jana mangihutkon hata ni Debata tu joloan on. Dung tardidi hamu annon, tanda ni parpadananmunu do i tu Debata, na ra do Ibana manyesa sude dosamunu jana mangalehen gogo tu hamu mangalo Sibolis dohot sandok dosa, jana gabe partohap ma hamu di hangoluan na salolot ni lolotna.

2.        TANGIANG

Ale Amanami na di banua ginjang, diida Ho do angka dongannami on, na giot tardidi. Diida Ho do na dibagasan roha ni halahi jana diboto Ho do, sanga na burju do roha ni halahi sanga na hum sipaulaula. Asi ma rohaMu, sai pargogoi ma halahi, anso mur diboto halahi mangg"otapkon sian nasa roha angka pangalaho na so ture. Ale Tuhan Jesus ! Sai sesa ma sude dosa ni halahi markitehite mudarMu, suru ma Tondi Parbadia i tu roha ni halahi be, anso tarhangoluhon halahi haporsayaan na sintong i salolot di tano on jana masuk sogot tu banua ginjang. Amen.

3.        SAPA-SAPA :

Tangihon hamu jolo Hata ni Tuhan Jesus, na nidokNa i di na laho manaek tu banua ginjang i Ibana. Madung sahat tu Au sude kuaso na di banua ginjang dohot na di tano on. Kehe ma hamu, paboa hamu ma tu sude bangso, didi hamu halahi tu bagasan Goar ni Ama, Anak dohot Tondi Parbadia. Barang ise na porsaya jana nipandidihon dapotan hangoluan do tapi na so porsaya hona uhum sogot.

On pe hupamanat ma saonnari haporsayaanmunu, anso dibege pariagutan na lagut nuaeng dison. Tangkas ma alusi hamu hata na husapai on :

1.          Diparhatutu rohamu do, pardosa ho sian hasosorangmu dohot
pangalaosionmu di tona ni Debata ?

Alusna : Diparhatutu rohangku do !

2.                     Bia, diarsakkon rohamu do sude dosa na nibaenmu na saidanna i ?

Alusna : Diarsakkon rohangku do !

3.                     Na ra do ho manggotapkon sian rohamu sudena dosa dohot pambaenanmu na so ture na saidanna i ?

Alusna : Na ra do au !

4.                     Diparhatutu rohamu do, Tuhan Jesus Kristus ro tu tano on jana mate di hayu na pasilang, anso malua hita sian dosa dohot sian gomgoman ni sibolis ?

Alusna : Diparhatutu rohangku do !

5.                     Na ra do ho ringgas mardomu tu Debata, anso gabe ruas na mangolu di Pariagutan ni Kristen Protestan ho manghajongjongkon haporsayaan na sintong i ?

Alusna : Na ra do au !

6.                     Antong oku hamu ma haporsayaanta i :

Au porsaya dohot udutna.

7.          Ra do hamu didion tu bagasan ni na nihaporsayaanmunu i ?

Alusna : Olo ! Na ra do au.

4.        PANDIDION :

Ale si............ ! Hudidi ma ho tu bagasan Goar ni Debata Ama dohot tu bagasan Goar ni AnakNa Tuhan Jesus Kristus dohot tu bagasan Goar ni Tondi Parbadia. Amen!

      

       Pasupasu :

Dipasupasu jana dijagahon Tuhan Debata ma ho, di hamamasukmon tu bagasan Harajaan ni Debata, olat ni on ro di salolot ni lolotna. Amen!

5.        ENDE :

6.        MARTANGIANG :

Ale Tuhan Debata, Amanami na marasi roha i ! Na mandok tarimakasi do hami nuaeng tu Ho, dibaen madung dijagit Ho dongannami on gabe dakdanakMu, markitehite pandidion na badia i. Asi ma rohaMu, sai pahot ma haporsayaan ni halahi, anso dohot parange ni halahi mamuji GoarMu na badia i, anso ulang mago nanggo sada sian halahi, tapi anso bolkas halahi tu hangoluan na so ra mantak markitehite Tuhan Jesus Kristus, Tuhannami.       Amen!

7.        ENDE :

8.        TANGIANG HAUL :

9.        TANGIANG  :  Ale Amanami .............................. dohot udutna.

10.           PASUPASU :

Dipasupasu jana dijagahon Tuhan Debata ma ho ! Disondangkon Tuhan Debata ma bohina tu ho, jana asi ma rohaNa di ho ! Diadopkon Tuhan Debata ma bohiNa tu ho, jana dipasaor ma dameNa tu Tondimu ! Amen.

      

       Amen, Amen, Amen !

3. PANDIDION NA NIHIPU ( TOMPU )

1.        PARAGENDA

Dibagasan goar ni Debata : Ama dohot goar ni AnakNa Tuhan Jesus Kristus dohot goar ni Tondi Parbadia. Amen!

Dipangido hamu saonnari didion dakdanakmuna on tu bagasan ni na ni haporsayaan ni Parlagutan Protestan ?

Alusna : Dipangido rohanami!

2.        PANDIDION

         Ale     ! Hudidi ma ho tu   bagasan goar ni Debata Ama, dohot tu bagasan goar ni Anakna Tuhan Jesus Kristus dohot tu bagasan goar ni Tondi Parbadia. Amen

3.        MARTANGIANG :

Ale Tuhan Debata, Pargogo na so hatudosan, Ama ni Tuhan Jesus Kristus Tuhannami. Asi ma rohaMu di dakdanak on, asa sahat tu tanganMu ma ibana, mangolu sanga mate pe. Hami boto donok do Ho di lambung ni angka na mamiohon goanVlu jana ditangihon Ho do halahi. Dibaen i sai asi ma rohaMu, sai pangolu ma dakdanak on, muda i na tumbuk tu lomo ni rohaMu, tapi muda laing na mangalap noma Ho di tondina, pamasuk ma ibana tu banua ginjang, tu hangoluan na salolot ni lolotna, markitehite hamatean ni AnakMu Tuhan Jesus Kristus Tuhannami. Tamba ni i, papos ma roha ni natorasna dohot roha ni angka sisolkotna tu Ho. Amen.

         Ale Amanami na di banua ginjang. Pinarbadia ma goarMu                           dohot udutna.

(Muda dung torkis muse dakdanak i, diboan natorasna ma ibana tu Gareja, di hatiha tardidi dakdanak na asing laho manjagit pasu - pasu )

4. MANJAGIT PARGURU NA GIOT TARDIDI

1.        ENDE

2.                  SIPAINGOT

Hamu ale dongan ! Dipangido hamu, giot masuk hamu tu parlagutan ni Tuhan Jesus Kristus gabe halak Kristen. Jop do rohanami manjagit hamu. Pangidoan na denggan do pangidoanmunu i anso mardomu hamu tu hami, tu Parlagutan ni halak Kristen na badia i. la na niarop ni rohamunu : Giot tandaonmunu Debata na sintong i jana giot masuk hamu tu hangoluan sogot. Harani i ingotonmunu ma on :

                               I.                      Margoar parguru dope hamu saonnari. Dung salpu sanga sadia lolot on, tardidi ma hamu, anso targoar" Kristen" hamu jana mardomu dohot hami.

                             II.                      Guruhononmunu ma tona dohot hata ni Debata, anso diboto hamu, sanga dia na tola dohot na so tola. Pataridahononnami ma tu hamu dalan tu hangoluan.

                           III.                      Pungka hamu ma olat ni on mangorom pantang dohot pasimbilkon na so jadi baenon. Ulang be marsomba tu begu, ulang be mamurai, ulang be manangko, ulang be mamunu, ulang be margabus, ulang be marjuji ( ulang marcandu ), ulang markarosuan d.n.a. Muda ra hamu pasimbilkon i, goaronnami ma hamu parguru.

Antong muda bulus rohamunu mangoloi i, dok hamu ma : Olo !

3.        TANGIANG

Ale Amanami na di banua ginjang. Na ro do dison dongannami giot masuk tu parlagutanMu. Tarimakasi ma rohanami tu Ho dibaen diungkap Ho pintu hamasuhon di angka dongan on. Sai asi ma rohaMu, jagahon jana pasu-pasu ma halahi, anso jabat halahi masuk tu parlagutanMu na badia i. Sai ajari jana togutogu ma halahi mangihutkon Tuhan Jesus Kristus Tuhannami. Amen !

             

              Ale Amanami na di banua ginjang ............................... dohot udutna.

4.        PASUPASU :

5.        MARENDE :