PITU TOHONAN PANDITA GKPA (LIHAT AGENDA GKPA)

PITU TOHONAN PANDITA GKPA

(LIHAT AGENDA GKPA)

Laho padalanhon tugas-tugas ni Pandita di tonga-tonga ni Parlagutan ni Tuhan i, ditophon GKPA do adong PITU PODA TOHONAN PANDITA GKPA. Pitu tohonan hapanditaon i, i ma:

1.          MANJAGAHON ARTA NI TUHAN. Jagahon hamu ma arta na sian Tuhan Jesus, songon na nibaen ni parmahan manjagahon habananNia, anso ulang mago. Angke mangampar ruji do hamu taringot tu na niparmahanmunu sogot diadopan ni Tuhan. Angkon gabe sitiruon do hamu ditonga-tonga ni angka na nipasahat tu hamu. Harani i tangkas ma baritahon hamu tu halahi hata ni Debata na tarsurat di angka surat na di Parjanjian na Honok dohot di angka surat na di Parjanjian na Imbaru. Uhal hamu ma sian hata i, poda, apul-apul, sipaingot, pangapoion dohot hata pamincangon hombar tu angka na masa. Songon i do dibaen angka apostel, songon na nidok ni Apostel Petrus : muda adong na marjamita dihatahon ma i songon hata ni Debata. Muda adong barang ise na marhobas, hombar ma i dibaen tu gogo na nilehen ni Debata di sia, anso dapotan hasangapan Debata markitehite Tuhan Jesus Kristus di sasude na i. Siporangon jana sipatuduhononmunu ma sandok poda-poda na maralo tu hata ni Debata. Marroha na lambok ma hamu mamincang angka si pangalo, anso dilehen Debata hamubaon ni roha, gabe diboto halahi hasintongan. Antong jagahon hamu ma dirimunu dohot pariagutan i, sanga tu dia pe hamu dipaojak Tondi Parbadia, anso diparmahani hamu pariagutan ni Debata, na dung nihopkopNa markitehite Tuhan Jesus Kristus. Angkon jamitahononmunu do hata sihaporsayaan i, i ma na nilehen ni Debata padenggankon jolma tu Ibana, angke i do dalan tu hangoluan, dalan tu haubaan ni roha dohot dalan pardamean ni jolma tu Debata. Pardengganan on- ma sipaboaonmunu tu angka na nipasahat tu hamu. Antong gonti ni Kristus do hamu mangelek-elek jana dokkononmunu ma : sai ra ma hamu padengganon tu Debata.

2.          MANDALANKON RUHUT-RUHUT PARMAHANION/PAMINCANGON. Songon tangkas ni pamodaionmunu di angka na ra tu hadaulaton tu Debata laing songon i ma dohot tangkas ni pamincangonmunu di angka na so ra tu hangoluan, anso ulang adong na mago hara ni na so adong sipaingot, jana ulang marsapata i tu hamu. Ingot hamu ma na tarsurat i: ia ho anak ni jolma madung dipabangkit ho gabe siparmahan Israel, angkon tangihononmu do hata na ruar sian pamanganKu. GontingKu ma ho palumbahon halahi. Muda hudok tu angka pardosa, na tu hamatean no ma ho, hape nada dipalumba ho ibana, nada disosoi ho anso dipauba rohana anso mangolu, na mate do tutu pardosa i, hara ni dosana, tapi sian tanganmu do tungguonKu mudarna. Tapi muda dipalumba ho hian pardosa i, hape nada ra ia paubahon rohana dohot pambaenanna, mate ma ibana tutu dibagasan dosana, tapi malua do anggo tondimu.

3.          PADALANKON SAKRAMEN PAMUNAN NA BADIA DOHOT PANDIDION NA BADIA. Tapi nada hum parkarejoan nangkin na nipasahat tu Pandita. Angke di na giot tadingkonon ni Tuhan Jesus Kristus tano on, jumolo do dipadiri parpambaenan na badia i. Pamunan na badia do na sarupa. Na sarupanari, i ma Pandidion na badia, songon na nitonahonNa i di na giot manaek i la tu banua ginjang. Anso patulusonmunu ma na dua ragam i, jana songon parhobas ni bagas ni Debata ma hamu disi. Tangkas ma pareso hamu, anso hum angka na tama jana na patut i ro tu pamunan, i ma angka na mananda dosana jana na mangarsakkon gabe ra paubahonsa. Ambatonmunu do angka na jungkat, angka na so ra mantak mardosa. Ingotonmunu do : na dipasahat Tuhan Jesus do anak kunci ni banua ginjang tu parlagutanNa i anso dipabali sude na so ra paubahon rohana, angke ninna do : Hulehen pe tu ho anak kunci ni harajaan na di banua ginjang i. Sandok na niuhummi di tano on, niihotan do i dohot banua ginjang, bope sandok na nipaluamu di tano on, malua muse ma i di banua ginjang.

4.          MANGAJARI DAKDANAK. Tamba ni i, reso ma hamu taringot tu na pauli-uli dakdanak songon na dibaen ni Tuhan Jesus. Angke songon on do sanoli didok Tuhan Jesus : Loas hamu ro dakdanak i tu Au, ulang rarang hamu halahi, dibaen di angka na songon i do Harajaan ni Debata. Harani i podahon hamu ma tu halahi pangarimpunan ni hata ni Debata ( Katekhismus ) dohot jamita tu angka dakdanak. Togu-togu hamu ma halahi marhadaulaton tu Debata jana marhapantunon tu jolma. Ambat hamu ma na giot hamamago tu halahi, di baen siparmahan do hamu, songon na nidok Tuhan Jesus : Parmahani hamu ma angka anak ni biri-biringKu.

5.          MANJAGOHON SUDE RUAS NI PARLAGUTAN. Jagahon hamu ma nasa pariagutan i, angka ama, ina, naposo bulung bope angka na mabalu, maniru pambaen ni Apostel Paulus. Dibaen songon didok tu halak Efesus : Harani i jago ma hamu, ingot hamu ma na so marpansadian au tolu taon honokna arian dohot bomgin paingotkon hamu dibagasan ilu-ilu ni matangKu. Tangiangkon hamu ma sude na nipasahat tu hamu, anso dijagahon Tuhan Jesus halahi jana dipasu-pasu markitehite Tondi Parbadia.

6.          DENGGAN MA PARANGEMUNU. Tamba ni sasudena i, denggan ma parangemunu, anso tarbaen gabe sitiruan hamu di na niparmahanmunu, di hata, pangalaho, haporsayaan dohot holong ni roha. Ingot hamu ma tongtong na nidok ni hata ni Debata : Anggo Pandita angkon ulang tarsinsal, halaklahi ni sada dadaboru do, ulang parmabuk, lata rohana, denggan parangena, jop rohana marbayo, na malo mangajari : ulang parminum tuak, ulang parbada, na so mangulului labo di dalan na geduk, tapi lidang do rohana, na so mambaen salisi, jana na so marimpol roha di sere. Na malo mangarajai dongan sabagasnia, denggan mardakdanak, na mangoloi ibana, dohot sude pantun ni roha. Angke muda adong barang ise na so malo mangarajai pangisi ni bagasna, songon dia dehe tarbaen ia manyarihon pariagutan ni Debata ?

7.          RENTA MANGKAREJOHON RUHUT NI PARKAREJOAN MANGIHUTKON ATURAN NI INDUK. Angkon renta baenonmu ruhut ni parkarejoanmunu mangihutkon aturan ni indukmunu. Sahata saoloan ma hamu dohot angka dongan Pandita : Dipangalaho ni pangoloion tu Debata, ulang paasing-asing pikiran, ulang marsalisi di hata dohot di roha, ulang marsijehean, anso tulus dumping hamu na nipangido ni Tuhan Jesus sian Amana di na nidokNa i : Sai jagahon ma halahi di bagasan goarMu na nilehenMi di Au, anso sada halahi songon hita.

Marhitehite Pitu Poda Hapanditaon on, muda adong sahalak pandita ni GKPA na so ra mangkarejohon jana manghangoluhon na pitu poda tohonan on, porlu ma hona parmahanion jana sipincangon halahini.

Ramli SN Harahap