INSPIRASI PAGI RAMLI SN HARAHAP: TATA IBADAH PAMASUMASUON TOHONAN PANDITA GKPA (TATA IBADAH PENAHBISAN PENDETA GKPA)

Senin, 19 Februari 2018

TATA IBADAH PAMASUMASUON TOHONAN PANDITA GKPA (TATA IBADAH PENAHBISAN PENDETA GKPA)

TATA IBADAH PAMASUMASUON TOHONAN PANDITA GKPA

(TATA IBADAH PENAHBISAN PENDETA GKPA)

1 E N D E : ( Ro ma tu jolo na giot manjagit tohonan )

2 TANGIANG

Ale Tuhan Debata Amanami Parasiroha na sumurung. AnakMu do na mangajarhon tu hami ; anso hami pangido tu Ho panyabi na burju sisuruonMu tu sabionMi, manjamitahon hataMu tu hajolmaon. Harani i do dibaen na ro hami saonnari tu adopanMu markitehite Tuhan Jesus Kristus Tuhannami mangido tu Ho : Sai topot ma hami na lagut dison, laho mangampehon karejo hapanditaon tu angka dongannami on. Lehen ma Tondi Parbadia tu halahi angka naung ni pabangkitMu anso malo halahi manjamitahon hataMu gabe marjop ni roha halahi maroban jamita na denggan i, na gabe hamuliaan ni Anak haholongan ni rohaMu. Ungkap jana patorang ma roha ni halahi, anso hot halahi dibagasan Ho, jana tobok roha ni halahi tongtong maniop hataMi dohot mangkaringgaskon parkarejoan na niampehonMu tu halahi. Sai tumpahi ma karejo ni halahi, anso dapotan upa halahi rap dohot na niparmahan ni halahi di hangoluan sogot markitehite Tuhan Jesus Kristus Tuhannami. Amin !

Hamu ale dongan, disuru Amanta na di banua ginjang i do AnakNa Tuhan Jesus Kristus ro tu tano on gabe jolma, anso tarbaen jolma mananda holong ni roha ni Debata di halahi, anso marpos ni roha halahi di Sia jana mulak halahi tu harajaan Mu, jana tola manean hangoluan salolot ni lolotna i. Dung sidung baenon ni AnakNa i di tano on, disorahon ma baenon i tu angka anak sisean i, anso halahi paboahon dohot pasahatkon na nihamonangkonNa i tu donganna jolma.

Tambani i didok Apostel Paulus do :

Dipabangkit Tuhanta do deba gabe apostel, deba gabe panurirang, deba gabe parjamita, deba gabe parmahan, deba gabe pangajari, anso sanggam situtu angka na badia i tu langgaman i. Sian i ma tangkas taboto, Tuhanta Jesus Kristus do na pahotkon Tohonan hapanditaon i.

Mangihutkon hata on, sai dipabangkit Debata do di tonga-tonga ni ParlagutanNa i angka pandita, sian olat ni na dung ojak parlagutanNa i 4\ tan* on, lopus tu saonnari.

3 MAMASA

Basaon ni Ephorus dohot angka Pandita ma : Bege hamu ma saonnan pandok ni Debata taringot tu tohonan hapanditaon i : Mat.28 : 18-20 ; Joh. 21 : 15-17 ; Baenon ni Rasul 20 : 17-35 ; I Tim.3 : 1-7 : II Tim. 1 : 5b.

4 E N D E

Antong ale dongan ! Tohonan na badia do sijagitonmunu saonnari, angke na sian Tuhan Jesus do Tohonan si songon i. Harani i hupaboa jana hupaingotkon ma tu hamu pangalahona laho mangkarejohon tohonan hapanditaon i, anso diboto hamu sanga bia dokdokna.

1. Jagahon hamu ma arta na sian Tuhan Jesus, songon na nibaen ni parmahan manjagahon habananNia, anso ulang mago. Angke mangampar ruji do hamu taringot tu na niparmahanmunu sogot diadopan ni Tuhan. Angkon gabe sitiruon do hamu ditonga-tonga ni angka na nipasahat tu hamu. Harani i tangkas ma baritahon hamu tu halahi hata ni Debata na tarsurat di angka surat na di Parjanjian na Honok dohot di angka surat na di Parjanjian na Imbaru. Uhal hamu ma sian hata i, poda, apul-apul, sipaingot, pangapoion dohot hata pamincangon hombar tu angka na masa. Songon i do dibaen angka apostel, songon na nidok ni Apostel Petrus : muda adong na marjamita dihatahon ma i songon hata ni Debata. Muda adong barang ise na marhobas, hombar ma i dibaen tu gogo na nilehen ni Debata di sia, anso dapotan hasangapan Debata markitehite Tuhan Jesus Kristus di sasude na i. Siporangon jana sipatuduhononmunu ma sandok poda-poda na maralo tu hata ni Debata. Marroha na lambok ma hamu mamincang angka si pangalo, anso dilehen Debata hamubaon ni roha, gabe diboto halahi hasintongan. Antong jagahon hamu ma dirimunu dohot pariagutan i, sanga tu dia pe hamu dipaojak Tondi Parbadia, anso diparmahani hamu pariagutan ni Debata, na dung nihopkopNa markitehite Tuhan Jesus Kristus. Angkon jamitahononmunu do hata sihaporsayaan i, i ma na nilehen ni Debata padenggankon jolma tu Ibana, angke i do dalan tu hangoluan, dalan tu haubaan ni roha dohot dalan pardamean ni jolma tu Debata. Pardengganan on- ma sipaboaonmunu tu angka na nipasahat tu hamu. Antong gonti ni Kristus do hamu mangelek-elek jana dokkononmunu ma : sai ra ma hamu padengganon tu Debata.

2. Songon tangkas ni pamodaionmunu di angka na ra tu hadaulaton tu Debata laing songon i ma dohot tangkas ni pamincangonmunu di angka na so ra tu hangoluan, anso ulang adong na mago hara ni na so adong sipaingot, jana ulang marsapata i tu hamu. Ingot hamu ma na tarsurat i: ia ho anak ni jolma madung dipabangkit ho gabe siparmahan Israel, angkon tangihononmu do hata na ruar sian pamanganKu. GontingKu ma ho palumbahon halahi. Muda hudok tu angka pardosa, na tu hamatean no ma ho, hape nada dipalumba ho ibana, nada disosoi ho anso dipauba rohana anso mangolu, na mate do tutu pardosa i, hara ni dosana, tapi sian tanganmu do tungguonKu mudarna. Tapi muda dipalumba ho hian pardosa i, hape nada ra ia paubahon rohana dohot pambaenanna, mate ma ibana tutu dibagasan dosana, tapi malua do anggo tondimu.

3. Tapi nada hum parkarejoan nangkin na nipasahat tu Pandita. Angke di na giot tadingkonon ni Tuhan Jesus Kristus tano on, jumolo do dipadiri parpambaenan na badia i. Pamunan na badia do na sarupa. Na sarupanari, i ma Pandidion na badia, songon na nitonahonNa i di na giot manaek i la tu banua ginjang. Anso patulusonmunu ma na dua ragam i, jana songon parhobas ni bagas ni Debata ma hamu disi. Tangkas ma pareso hamu, anso hum angka na tama jana na patut i ro tu pamunan, i ma angka na mananda dosana jana na mangarsakkon gabe ra paubahonsa. Ambatonmunu do angka na jungkat, angka na so ra mantak mardosa. Ingotonmunu do : na dipasahat Tuhan Jesus do anak kunci ni banua ginjang tu parlagutanNa i anso dipabali sude na so ra paubahon rohana, angke ninna do : Hulehen pe tu ho anak kunci ni harajaan na di banua ginjang i. Sandok na niuhummi di tano on, niihotan do i dohot banua ginjang, bope sandok na nipaluamu di tano on, malua muse ma i di banua ginjang.

4. Tamba ni i, reso ma hamu taringot tu na pauli-uli dakdanak songon na dibaen ni Tuhan Jesus. Angke songon on do sanoli didok Tuhan Jesus : Loas hamu ro dakdanak i tu Au, ulang rarang hamu halahi, dibaen di angka na songon i do Harajaan ni Debata. Harani i podahon hamu ma tu halahi pangarimpunan ni hata ni Debata ( Katekhismus ) dohot jamita tu angka dakdanak. Togu-togu hamu ma halahi marhadaulaton tu Debata jana marhapantunon tu jolma. Ambat hamu ma na giot hamamago tu halahi, di baen siparmahan do hamu, songon na nidok Tuhan Jesus : Parmahani hamu ma angka anak ni biri-biringKu.

5. Jagahon hamu ma nasa pariagutan i, angka ama, ina, naposo bulung bope angka na mabalu, maniru pambaen ni Apostel Paulus. Dibaen songon didok tu halak Efesus : Harani i jago ma hamu, ingot hamu ma na so marpansadian au tolu taon honokna arian dohot bomgin paingotkon hamu dibagasan ilu-ilu ni matangKu. Tangiangkon hamu ma sude na nipasahat tu hamu, anso dijagahon Tuhan Jesus halahi jana dipasu-pasu markitehite Tondi Parbadia.

6. Tamba ni sasudena i, denggan ma parangemunu, anso tarbaen gabe sitiruan hamu di na niparmahanmunu, di hata, pangalaho, haporsayaan dohot holong ni roha. Ingot hamu ma tongtong na nidok ni hata ni Debata : Anggo Pandita angkon ulang tarsinsal, halaklahi ni sada dadaboru do, ulang parmabuk, lata rohana, denggan parangena, jop rohana marbayo, na malo mangajari : ulang parminum tuak, ulang parbada, na so mangulului labo di dalan na geduk, tapi lidang do rohana, na so mambaen salisi, jana na so marimpol roha di sere. Na malo mangarajai dongan sabagasnia, denggan mardakdanak, na mangoloi ibana, dohot sude pantun ni roha.

Angke muda adong barang ise na so malo mangarajai pangisi ni bagasna, songon dia dehe tarbaen ia manyarihon pariagutan ni Debata ?

7. Angkon renta baenonmu ruhut ni parkarejoanmunu mangihutkon aturan ni indukmunu. Sahata saoloan ma hamu dohot angka dongan Pandita : Dipangalaho ni pangoloion tu Debata, ulang paasing-asing pikiran, ulang marsalisi di hata dohot di roha, ulang marsijehean, anso tulus dumping hamu na nipangido ni Tuhan Jesus sian Amana di na nidokNa i : Sai jagahon ma halahi di bagasan goarMu na nilehenMi di Au, anso sada halahi songon hita.

5 E N D E

Antong madung dibege hamu hatontuan taringot tu Tohonan Hapanditaon songon na nipatorang ni hata ni Debata.

Na manyapai ma au nuaeng tu hamu :

1. Dioku jana diparhatutu rohamu do : Angka surat na di Parjanjian na Honok dohot di Parjanjian na Imbaru, i do hata ni Debata na patuduhon dalan tu hangoluan na so ra mantak i, jana na ra do ho mangambungkon poda na asing-asing dohot mangalo nasa na maralo tu hata na tarsurat disi.

Alusna : Diparhatutu rohangku do na hata ni Debata do i, jana aloonku do nasa na so mardomu tusi.

2. Na ra do ho mangkarejohon na nipangido di Tohonan Hapanditaon i songon na nipatubegehon nangkin, i ma taringot tu poda dohot pangalaho, jana na ra do ho mamparateatehon hata sipaingot na sian indukmu di hatihana?

Alusna : Parate-atehononku jana patulusonku ma i.

Antong na jongjong do hamu saonnari di adopan ni Debata dohot parlagutan on. Muda na dung sada situtu rohamunu manjagit Tohonan Hapanditaon i, jana na ra do hamu patuluskonsa sian sandok rohamunu, dok hamu ma :

Na ra do au, sai didongani asi ni roha ni Debata ma au patuluskon sasudena i.

6 E N D E :

7 MAMASU-MASU :

Ephorus mandok : Hupabangkit jana huiasi ho gabe Pandita di Gareja Kristen Protestan Angkola markitehite goar ni Debata Ama, Anak dohot Tondi Parbadia. Dipatiur, dipargogoi jana ditogu-togu Tuhanta i ma ho markitehite Tondi Parbadia mangkarejohon Tohonan Hapanditaon i, anso gabe parkarejo na burju ho, na marbatuhon parbatu na denggan ro di salolot ni lolotna. Dipasingkop Tuhan Debata ma ho tu parkarejoan i, patuluskon na domu tu hataNa, markitehite Tuhan Jesus Kristus sipasangapon i, lopus tu na salolot ni lolotna. Amen !

8 E N D E :

9 TANGIANG :

Ale Tuhan Debata Amanami na di banua ginjang ! Sasada Ho do na tuk pasanggamkon angka naposoMu sisuruanMu tu parkarejoan di harajaanMi. PangalehenMu do di huaso dohot hamaloon, anso patar jana mur timbul baenonMi.

Harani i ma umbaen na ro hami markitehite Tuhan Jesus Kristus Tuhannami mangido tu Ho:

Torangi ma angka roha ni naposoMi. Iring-iring ma halahi markitehite tanganMu na badia i.

Parmaloi ma haiahi mangkarejohon Tohonan na nipasahatMu sadari on tu haiahi anso denggan parkarejoan i di pariagutanMu jana mur rarat harajaanMu tu sude portibi on.

Sai lehen ma TondiMu na badia i mangajari dohot manogu-nogu haiahi anso tartogu haiahi donganna jolma tu panghopkopon ni AnakMu markitehite mudarNa na badia i, gabe bolkas tu Ho, anso rap hami di hasonangan sogot i pasangapkon Ho di bagasan Tuhan Jesus Kristus Tuhannami. Amen!

10 ENDE :