TATA IBADAH PAMASU-MASUON TOHONAN GURU PARLAGUTAN PARJAMITA INA / DIAKONES *) (TATA IBADAH PENAHBISAN GURU JEMAAT/BIBELVROW/DIAKONES DI GKPA)

TATA IBADAH PAMASU-MASUON TOHONAN GURU PARLAGUTAN

PARJAMITA INA / DIAKONES *⁾

(TATA IBADAH PENAHBISAN GURU JEMAAT/BIBELVROW/DIAKONES DI GKPA)

1          E N D E    :                                                                         (Jongjong na giot pasu-pasu on)

2                     SIPAINGOT   : Hamu dongan sahaporsayaan di bagasan Jesus Kristus !

Dihaporsayai rohanta do basa Tuhan Debata do na pabangkithon di Parlagutan i na gabe : Apostol, Nabi, Parjamita, Pangajari, laho pasingkophon halak na marhabadiaon tu karejo panghobasion di Parlagutan ni Tuhanta. Sudena halahi manjagit hagogoon ni Tondi Parbadia na ro tu halahi, anso gabe saksi ni Jesus Kristus halahi mulai sian Jerusalem tu Judea, tu Samaria lopus tu ujung ni portibi on. Jadi dibolus halahi ma sude huta laho manjamitahon dohot mamaritahon Jesus tu sude bangso jana pamalumkon angka na marnyae di sude inganan dohot huta. Martangiang do Parlagutan i tu Debata hatiha pasahatkon halahi tu karejo hasaksian dohot panghobasion i. Sadalan tusi ma, hatiha on jongjong do di jolo ni Parlagutan on donganta na giot pabangkiton gabe partohonan Guru Parlagutan / Parjamita Ina / Diakones di Gereja Kristen Protestan Angkola. Dipangido halahi do pasu-pasu sian Tuhanta, anso margogo halahi di sude karejo pelayanan na dipasahat tu halahi di Parlagutan i. Anso sada roha ni halahi sadari on manjagit tohonan i, dohot ma hita manangiangkon halahi, anso dipargogoi Tuhanta halahi markitehite Tondi Parbadia di sude karejo dohot panghobasion ni halahi di Parlagutan i.

3          SIPAINGOT     :                                                                             (tu na giot pasu-pasuon )

Hamu dongan na giot pabangkiton gabe partohonan Guru Parlagutan / Parjamita Ina / Diakones di Gareja Kristen Protestan Angkola. Hatiha so dipasahat dope Tohonan i tu hamu, tangihon hamu ma hata ni Debata na gabe ojahan di hamu mangkobasi di Parlagutan ni Tuhanta i, didok do : " Antong jagahon hamu ma dirimunu dohot sude habanan i, harana madung dipabangkit Tondi Parbadia hamu gabe parmahan. Parmahani hamu ma Parlagutan ni Tuhan   i,   na   nibaen   gabe   nampunaNia   markitehite   mudarNia   sandiri".

( B.Apostol 20 : 28 ).

Antong, na gabe pangarimpunan ni tugas panghobasionmunu na dipasahat tu hamu sadari on, i ma :

         *) Dipili ma na hombar tu karejo na dipatupa

1                       Parkarejo na martohonan do hamu na mangurupi Pandita, laho manogu-nogu dohot mamnahani ruas ni Parlagutan di Gareja Kristen Protestan Angkola. Dibaen dongan sakarejo ni Pandita do hamu, asa ringgas ma hamu manjamitahon dohot mamaritahon hata ni Debata na tarsurat di Parjanjian na Honok dohot Parjanjian na Imbaru tu sude jolma na di portibi on.

2                       Dibaen Guru Parlagutan / Parjamita Ina / Diakones do hamu di pariagutan i, angkon sian nasa rohamunu dohot gogomunu do baen hamu manghobasi di Parlagutan i laho mangajari, marmahani dohot pangoluhon partondion ni sude dakdanak, naposo bulung, ina, dohot ama.

3                       Jana angkon togu-toguonmunu do halak na so mananda asi ni roha ni Debata dope, anso dohot halahi mananda dohot manjagit hangoluan na sian Tuhan Jesus Kristus.

4                       Na gabe tiruan ma hamu di Pariagutan i dibagasan haporsayaan, hoiong ni roha, di parkataan dohot di sude pambaenan na denggan i.

4          E N D E :

5                     SAPA-SAPA :

Madung tangkas dibege hamu taringot tu Tohonan dohot tugas pelayananmunu di Parlagutan ni Tuhanta. On pe, giot botoonnami do burju ni rohamunu dohot sada ni rohamunu manjagit dohot mandalankon Tohonan Guru Parlagutan / Parjamita Ina / Diakones na dipasahat tu hamu sadari on, antong alusi hamu ma sapa-sapa on :

1                       Dihaporsayai rohamunu do basa Tuhan Debata do mamuldit dohot na marsuru ho gabe Guru Parlagutan / Parjamita Ina / Diakones di Pariagutan i ?

2                       Ra do ho mandalankon sude tugas panghobasion i sian nasa rohamu hombar tu na nipangido ni hata ni Debata di jolo ni Debata dohot di jolo ni jolma ?

3                       Ra do ho manghangoluhon dohot manghaburjuhon jana mandalankon tohonanmi dohot poda ni Tuhan i jana mamarangehon sian nasa gogomu anso tulus karejomu gabe parbarita na uli ?

4                       Ra do ho mamparateatehon sipaingot sian indukmu di hatihana ?

Muda na dung sada do rohamu mangoku jana marpadan giot mandalankon sudena tugas pelayanan i, dok ma alusmu di jolo ni Debata dohot di jolo ni Parlagutan on.

         ( alus ni na giot pasu-pasuon )

"Na porsaya do au, jana na marpadan ma au, na ra do au mandalankon sudena tugas panghobasion i, sai dipargogoi asi ni roha ni Debata ma au patuluskon sudena i".

Sadalan tu pangokuonmunu na gabe padanmunu tu Debata, antong hupasahat ma tu hamu Tohonan Guru Parlagutan / Parjamita Ina / Diakones di Gareja Kristen Protestan Angkola.

6          PASU-PASU :

"Dipasu-pasu jana dipabangkit Tuhan Debata : Ama, AnakNa Tuhan Jesus Kristus dohot Tondi Parbadia ma ho gabe : Guru Parlagutan / Parjamita Ina/ Diakones di Gareja Kristen Protestan Angkola, sai dipargogoi jana diparrohai Tuhan Debata ma ho mandalankon Tohonan na dipasahat tu ho sadari on baen hasangapon ni Debata ". Amen !

(Dung sidung, jongjong na tarpasu-pasu adop Parlagutan i dungi didok na manguluhon i ma )

Hamu sude dongan sahaporsayaan na di Parlagutan ni Tuhanta, anso rade ma hita manjagit dohot mangurupi donganta on di tugas panghobasionna di Parlagutan i, jana sude ma hita manangiangkon halahi, anso dipargogoi Tuhanta halahi jana anso gabe hamuliaon ni Debata panghobasion ni halahi di Parlagutan i.

7          TANGIANG      :                                                                                Martangiang ma hita !

Ale Tuhan Debata, Amanami na di banua ginjang, tarimakasi ma hami sombahon tu adopanMu, dibaen dipuldit jana disuru Ho do dongannami on gabe parhobasMu di PariagutanMu di GKPA. Dongani jana pargogoi ma halahi markitehiteTondiMu, di napararatkon harajaanMu halahi tu sude jolma, anso gabe saksiMu na sintong halahi, na burju mandalankon tohonanna. Pasu-pasu ma karejo ni halahi anso mur rarat harajaanMu jana mur bahat na ra porsaya tu goarMu. Tangihon ma tangiangnami on markitehite asi ni rohaMu di bagasan goar ni AnakMu Tuhan Jesus Kristus Tuhannami. Amen !

        

         ( Mandok hata utusan ni na tarpasu-pasu i)

8          E N D E :

9                     AGENDA PANUTUP :

 rasenaha'18