TATA IBADAH MANGUBUR NA MONDING DI GKPA (TATA IBADAH MENGUBUR ORANG MENINGGAL DI GKPA)

TATA IBADAH MANGUBUR NA MONDING DI GKPA

(TATA IBADAH MENGUBUR ORANG MENINGGAL DI GKPA)

Tata ibadah mangubur na monding di GKPA dipatupa ma tolu hatiha ima:

1. Sibaenon di bagas

2. Sibaenon di Gareja dohot

3. Sibaenon di kuburan

I. SIBAENON DI BAGAS

A.    TU NA MAGODANG :

1.                   ENDE :

2.                   VOTUM:

Dibagasan goar ni Debata   : Ama, dohot AnakNa Tuhan Jesus Kristus, dohot Tondi Parbadia na manompa langit dohot tano on. Amen (Ayat sibasaon sada sian na ditoru on)

1.                    Didok Tuhanta Jesus : Au do hangongot dohot hangoluan, na mangolu do na porsaya di Au, atik pe mate ibana, jana ganup na mangolu jana na porsaya di Au, na so tola mate ibana salolot ni lolotna. (Jon: 11:25-26)

2.                    Angke nada adong barang ise na mangolu di dirina. Dibaen na mangolu pe hita, mangolu di Tuhan i do hita, ia na mate pe hita, mate di Tuhan i do hita ; harani i sanga na mangolu sanga na mate hita, laing di Tuhan i do hita.

(Roma 14: 7-8)

3.         Madung dibondut hamatean tu bagasan hamonangan. Jo hamatean, di dia
ma he sorotmu? Jo api naroko di dia ma he hamonanganmu? (I Korintus: 15: 54b - 55).

4.                    Didok Debata di bagasan hataNa : Harana angkon jongjong do hita sude di jolo ni panguhuman ni Kristus i, jana ganop be angkon manjagit balos satontang tu pambaenanna be taran mangolu, pangalaho na denggan sanga najat. (II Korint 5 : 10).

5.                    Debata na paluahon do anggo Debatanta. Debata, Tuhanku mangalehen haluaan sian hamatean. (Masmur68. 20)

3.         TANGIANG :  Martangiang ma hita !

Ale Tuhan Jesus Tuhannami ! Diida Ho do hami na marsak jana na mardondam paadop-adop dongannami, na dung sirang sian hami, sinirang ni hamatean on. Na marilu-ilu do hami, holom jana soratan do rohanami hara ni dokdok ni partinaonannami on. Sai tatap jana ligi ma hami, ale Tuhan ! Copkon ma tu hami pangapoi na sumurung na sian hataMi anso manahan hami jana manongtong haporsayaannami di hamarsahan on, anso dapotan gogo hami marsitiopan tu Ho, Sipangolu hami. Amen.

4.                   JAMITA       : (Sanga mamasa sian Hata ni Debata)

5.                   TANGIANG  :  Martangiang ma hita!

a.       Ale Tuhan Debata pargogo na so hatudosan, na so marmula na so marujung. Dipatupa Ho do haluaon dohot hasesaan ni dosa di hami markitehite AnakMu Tuhan Jesus Kristus Tuhannami. Hami pangido tu Ho sai tambai ma haporsayaannami, jana pahot ma arop ni rohanami di sude arsak ni rohanami binaen ni hamatean on. Sai pargogoi ma hami paubahon rohanami, laho mangayahi hangoluan na sumurung i, na nipasingkopMu di hami, anso ulang sirang hami sian Ho, di na mangolu sanga na mate pe hami. Sai tatap ma dongannami on, ima angka sisolkot dohot dongan ni na dung monding on. Sai pahot ma roha ni halahi marhaposan tu Ho. Sai apoi jana pasonang ma roha ni halahi. Amen!

b.       Ale Tuhan Jesus Tuhannami! Ho do haporusannami dohot haroroan ni apo-apo di hami. Harani i do umbaen na tu Ho hami mangido. Sai tatap madongan nami on na dibagasan arsak ni roha saonnari. Sai pangkilalahon ma asi dohot holong ni rohaMu tu halahi, anso ditanda halahi Ho jana diingot halahi guru di Ho do sude  jolma, jadi bo masa parhancitan sanga pandugaan angkon gabe parhitean ni pasu-pasu do i tu hami. Sai sondangi jana sungguli ma rohanami marningot hasusude ni bohalnami, bope manjalahi hangoluan na so ra mantak na di lambungMi. Amen !

6.         E N D E   :                                                     ( Muda dioban tu gareja olat ni on ma acarana )

7.         MANUTUP BATANG :                                                                                                               (Muda di bagas ditutup batang i)

                   (Paragenda)

Hum paradianan satongkin do portibi on di hita, nada adong na manongtong, tapi na mardalan do hita dompak surgo i ma inganan na manongtong ro di salolot ni lolotna.

        

                   ( Tangiang manutup batang ):

Ale Tuhan Debata ! Hum guru di Ho do hami be ! Tu asi ni rohaMu hami pasahat saonnari dongannami on.

Tuhan Debata ma na manjagahon si ......................... on,

laho ruar dohot laho masuk, olat ni on ro di salolot ni lolotna. Amen!

Antong dibagasan sonang ni roha ma hita, manaruhon donganta na monding on tu inganan paradiananna.

8.         E N D E   :                                                  (Hatiha manutup batang dohot di dalan)

B.    TU DAKDANAK

1.                   ENDE

2.                   VOTUM

Dibagasan goar ni Debata : Ama, dohot AnakNa Tuhan Jesus Kristus, dohot Tondi Parbadia na manompa langit dohot tano on. Amen !

                             (Mamasa sada ayat na di torn on)

a.       Didok Tuhanta Jesus : Laing songon i muse ma, nada jop roha ni Amamunu na di banua ginjang mago sada sian na menek on. (Mat. 18:14)

b.       Didok Tuhanta Jesus Kristus : Loas hamu ma ro dakdanak i tu Au, ulang rarang hamu halahi, dibaen di angka na songon i do harajaan ni Debata. Tutu do na hudok on tu hamu, barang ise na so manjagit harajaan ni Debata songon dakdanak on nada masuk ia tusi. (Markus 10.14-15).

c.       Tuhan Debata do mangalehen, jana Tuhan Debata do muse mamiosa ! Nipuji ma goar ni Debata ! (Job. 1:21b)

        

                   Martangiang ma hita !

Ale Tuhan Debata Amanami markitehite Tuhan Jesus Kristus Tuhannami ! Diida Ho do arsak ni rohanami. Ibo ma rohaMu, tatap ma hami angka na marsak jana na markutondo manangtsi dakdanak on, si jop ni rohanami hian. Dibagasan umur na poso dakdanak on madung langka sian jolonami. Holong ni rohaMu di angka dakdanak dohot rohaMu na sun denggan i maradophon angka dakdanak i do na hami ingot jana na hami tiop di arsak ni rohanami on : Lehen ma haporsayaan na togu tu hami anso diparhatutu jana dihaposi rohanami: Ho sajo do na manogu dakdanak on, hosana dohot tondina tu lambungMu, asa patumbuk ma ibana gabe parjambar di hasangaponMu. Patogu jana apoi ma roha ni simatobangna, apohon ma hataMu dohot baga-bagaMi tu bagasan roha ni halahi, anso sobar halahi manaon arsak ni roha on, jana monang di pandugaan on, bope anso manongtong haporsayaan ni halahi. Togu-togu ma halahi di pamgoluonna anso tongtong dibagasan na marpos ni roha halahi di HataMu, jana sude pambaenan dohot parange ni halahi tongtong pasangapkon goarMu na badia i. Amen !

3.         E N D E :

4.         JAMITA  :

5.                   ENDE :

6.             TANGIANG:

         Martangiang ma hita !

Ale Tuhan Debata Amanami parholong roha na sumurung di angka dakdanak ! Sai sahat tu gomgoman ni asi ni rohaMu ma dakdanak on, na dung langka sian adopannami on.

Pasintong ma di ibana asi ni rohaMu dohot denggan ni basaMu, jana jagit ma ibana di HarajaanMu, di hangoluan na salolot ni lolotna di lambungMi, hombar tu padanMu na badia i! Amen

                            

                             ( Giot manutup batang )

-        Hum paradianan satongkin do portibi on di hita, nada adong na manongtong,
tapi na mardalan do hita dompak surgo, i ma inganan na manongtong ro di salolot ni lolotna.

              ( Tangiang manutup batang )

-        Ale Tuhan Debata ! Hum guru di Ho do hami be. Tu asi ni rohaMu ma hami pasahat saonnari dakdanak on.

Tuhan Debata ma na manjagahon si .............. on, laho ruar dohot laho masuk, olat ni on ro di salolot ni lolotna. Amen !

Antong dibagasan sonang ni roha ma hita manaruhon dakdanak na monding on tu inganan paradianan na.

7.         E N D E   :                                                  (Hatiha manutup batang dohot di dalan)

II. SIBAENON DI GAREJA

1.                  ENDE

2.        A Y A T      :                                                                          (Ayat sibasaon sada sian na di toru on)

1.                   Didok Tuhanta Jesus : Au do hangongot dohot hangoluan, na mangolu do na porsaya di Au, atik pe mate ibana, jana ganup na mangolu jana na porsaya di Au, na so tola mate ibana salolot ni lolotna. (Joh: 11:25 - 26)

2.                   Angke nada adong barang ise na mangolu di dirina. Dibaen na mangolu pe hita, mangolu di Tuhan i do hita, ia na mate pe hita, mate di Tuhan i do hita ; harani i sanga na mangolu sanga na mate hita, laing di Tuhan i do hita. (Roma 14 : 7-8)

3.         Madung dibondut hamatean tu bagasan hamonangan. Jo hamatean, di dia ma he sorotmu? Jo api naroko di dia ma he hamonanganmu? (I Konntus : 15 : 54b - 55).

4.                   Didok Debata di bagasan hataNa : Harana angkon jongjong do hita sude di jolo ni panguhuman ni Kristus i, jana ganop be angkon manjagit balos satontang tu pambaenanna be taran mangolu, pangalaho na denggan sanga najat. (H Korint 5: 10).

5.                   Debata na paluahon do anggo Debatanta. Debata, Tuhanku mangalehen haluaan sian hamatean. (Masmur68: 20)

3.        TANGIANG       :                                                                               Martangiang ma hita !

Ale Tuhan Jesus Tuhannami ! Diida Ho do hami na marsak jana na mardondam paadop-adop dongannami, na dung sirang sian hami, sinirang ni hamatean on. Na marilu-ilu do hami, holom jana soratan do rohanami hara ni dokdok ni partinaonannami on. Sai tatap jana ligi ma hami, ale Tuhan ! Copkon ma tu hami pangapoi na sumurung na sian hataMi anso manahan hami jana manongtong haporsayaannami di hamarsahan on, anso dapotan gogo hami marsitiopan tu Ho, Sipangolu hami. Amen.

4.        JAMITA :

5.                  E N D E :

6.        TANGIANG       :                                                           Martangiang ma hita !

a.       Ale Tuhan Debata pargogo na so hatudosan, na so marmula na so marujung. Dipatupa Ho do haluaon dohot hasesaan ni dosa di hami markitehite AnakMu Tuhan Jesus Kristus Tuhannami. Hami pangido tu Ho : sai tambai ma haporsayaannami, jana pahot ma arop ni rohanami di sude arsak ni rohanami binaen ni hamatean on. Sai pargogoi ma hami paubahon rohanami, laho mangayahi hangoluan na sumurung i, na nipasingkopMu di hami, anso ulangbsirang hami sian Ho, di na mangolu sanga na mate pe hami. Sai tatap ma dongannami on, ima angka sisolkot dohot dongan ni na dung monding on. Sai pahot ma roha ni halahi marhaposan tu Ho. Sai apoi jana pasonang ma roha ni halahi. Amen!

b.       Ale Tuhan Jesus Tuhannami ! Ho do haporusannami dohot haroroan ni apo-apo di hami. Harani i do umbaen na tu Ho hami mangido. Sai tatap ma dongannami on na dibagasan arsak ni roha saonnari. Sai pangkilalahon ma asi dohot holong ni rohaMu tu halahi, anso ditanda halahi Ho jana diingot halahi guru di Ho do sude jolma, jadi bo masa parhancitan sanga pandugaan angkon gabe parhitean ni pasu-pasu do i tu hami. Sai sondangi jana sungguli ma rohanami marningot hasusude ni bohalnami, bope manjalahi hangoluan na so ra mantak na di lambungMi. Amen !

7.        E N D E                                         (Oi lehen kesempatan tu keluarga mangaligi tu batang i)

8.        MANUTUP BATANG   :

         (Paragenda)

Hum paradianan satongkin do portibi on di hita, nada adong na manongtong, tapi na mardalan do hita dompak surgo i ma inganan na manongtong ro di salolot ni lolotna.

        

         ( Tangiang manutup batang ):

Ale Tuhan Debata ! Hum guru di Ho do hami ! Tu asi ni rohaMu hami pasahat saonnari dongannami on.

      

       Tuhan Debata ma na manjagahon si ............... on,

       laho ruar dohot laho masuk, olat ni on ro di salolot ni lolotna. Amen !

Antong dibagasan sonang ni roha ma hita, manaruhon donganta na monding on tu inganan paradiananna.

9.        E N D E    :                                                                       (Hatiha manutup batang dohot di dalan )

III. SIBAENON DI KUBURAN

( Pamasuk Batang tu Kuburan )

1.        ENDE :

2.        MAMASA AYAT : 

                                                                                                                               (Mamasa sada ayat na di toai on)

Tangkas do huboto mangolu do Sipangolu au, jana Ibana parpudi jongjong di ginjang ni orbuk. la madangke pe huling-hulingkon jana malua sian sibukkon idaonku ma Debata. Au sandiri ma tutu marnida Ibana gabe hatuaonku. (Job. 19:25 - 27)

Di na ro hatihana, begeon ni sude angka halak na di tanoman i ma soaraNa, dungi ruar be ma angka na mangkarejohon na denggan, ngot tu hangoluan ; tapi angka na mangkarejohon na jat, ngot tu uhuman i do. ( Johannes 5 : 28b - 29 )

Martua ma angka na mate di bagasan Tuhan i, olat ni on. Olo tutu ninna Tondi i, na maradian do halahi sian baenon ni halahi, tapi na mangihut tu halahi do na binaen ni halahi. (Haiumbaan 14:13)

Nada tarbaen sibuk dohot mudar manean harajaan ni Debata, jana nada tartean na ra busuk i na manongtong i. Dibaen i angkon na manongtong i do manyoluk angka na ra busuk on, jana ngolu na manongtong i do manyoluk na ra mate on. Tapi Debata na dung pangoluhon Tuhan Jesus Tuhanta i, pangoluon ni i do hita markitehite hagogoonNa i. (IKorintus15:50, 53)

Dung i huida ma angka na dung mate i, angka na menek bo na ma godang, jongjong di jolo ni habangsa i. Jadi diungkap ma angka buku, dungi diungkap ma sada buku na asing, i ma buku hangoluan, jadi diuhumi ma angka na mate i marguru tu pambaenanna be.   (Haiumbaan 20:12)

3.        TANGIANG :                                                                                         Martangiang ma hita

1.      Muda halak na matobang situtu

               Ale Tuhan Debata Amanami parasi roha dibagasan Jesus Kristus Sipangolu hami, saonnari hami pasahat ma tu tanganMu dongannami on, ompu on. Parjolo mandok tarimakasi godang ma hami tu adopanMu mamingot sude denggan ni basaMu angka na dipatongonMu tu ompu on sahonok di ngoluna. Tu asi ni rohaMu ma hami pasahat ibana. Dibaen i jagahon, podai jana togu-togu ma hami sude angka sisolkotna, anso mur sada rohanami mangihutkon Ho Sipangolu jana na manghophop hami, anso tongtong hami di bagasan haporsayaan dohot arop ni roha na sintong. HataMu na sintong dohot baga-bagaMu na so ra muba i ima patoguhon dohot manjagahon pamatang dohot tondinami tu hangoluan na salolot ni lolotna, na dung dipasingkopMu di banua ginjang, Amen !

2.     Muda  Ama  sanga  Ina  na  maninggaikon  dongan  saripena sanga
dakdanakna.

          Ale Tuhan Debata Amanami parasi roha di bagasan Jesus Kristus Tuhannami. Dibagasan marsak dohot ponjot ni roha do hami saonnari jongjong di lambung ni kuburan na talak on, laho pasahatkon dongannami on tu gomgomanMu, panite ro ariMu na godang i. Diida Ho do hami di^ hatiha on jaia dipangkilalahon rohaMu do arsak dohot dokdok ni sitaononnami on. Tatap, apoi jana pasada ma rohanami marposniroha dohot mararop ni roha tu Ho Sipangolu jana Sihophop hami. Copkon ma tu rohanami hangoluan sogot, anso tangkas ditiop rohanami baga-bagaMu, na dung dipasingkop Ho inganan hasonangan i di hami. Papos ma roha ni sude keluarga ni na marsitaonon on, jana patulus ma baga-bagaMu tu halahi, basa Ho do Ama di angka na tinggal menek jana na gabe pangondian di angka na mabalu, anso Ho sajo dihaposi roha ni halahi. Apoi, pargogoi jana parbadiai ma hami, angka na tinggal dope di rura linggoman ni hamatean on, anso tarpabongkot Ho hami sogot di hasusude ni ajalnami tu banua ginjang. Amen !

3.      Muda na mataipok di harapotan, doli-doli sanga bujing-bujing sanga
na manigor mabalu.

          Ale Tuhan Debata Amanami markitehite Jesus Kristus Tuhannami ! Ho do ale Debata na dilului rohanami na marsak jana na mardondam on laho pasahatkon tu Ho dongannami na dung dialapMu sian hasiangan on. Ajari ma hami marhaposan tu Ho, jana marpohom ni roha di joloMu. Copkon ma di rohanami be pangapoi sian banua ginjang, anso hami tiop hataMu na sintong i di arsak ni rohanami on. Na mararop ni roha hian do hami, anso lumolot di lambungnami haholongan ni rohanami on hape madung langka sian hami on. Hum pambaenanMu na sun denggan i do na hami undukkon jana na hami hasonangkon dibaen na so ra hami mandele. Togu-togu ma rohanami bope roha ni keluarga dohot sisolkot ni na dung monding on jana mur pasolkotkon hami ma sitaonon on marpangoloion na polin di hataMu. Patubu ma di hami arop ni roha na mangolu salolot diloas Ho dope hami mangingani pardagangan on. Amen.

4.   Muda na mate dakdanak.

          Ale Tuhan Debata Amanami markite Jesus Kristus Tuhannami ! Na ro do hami saonnari tu adopanMu laho pasahatkon dakdanak on tu Ho. Ho hian do nampunasa jana Ho do manghopkopsa markitehite mudarMu sandiri. Tu gomgoman ni asi ni rohaMu ma hami pasahat saonnari dakdanak on na dung nitobusMi. Ibo ma rohaMu di simatobangna dohot di sude na di tinggalkonna di rura linggoman ni hamatean on. Apoi, pargogoi jana pasobar ma roha ni halahi. Sai papatar ma tu halahi hasintongan ni hataMu na badia i, anso hot di Ho halahi jana digomgomi, ditogu-togu tondiMu halahi tu haporsayaan dohot tu arop ni roha na sintong i. Togu-togu ma rohanami on sudena, anso mur hami halungunkon hangoluan dohot hasonangan na sun denggan na di lambungMi. Amen.

4.        ENDE :

5.                  TANGIANG PASAHATKON :   

                                                                                                         ( Hata laho pasahatkon tu Debata)

         Sian tano do parmulaan ni si        on, mulak ma i jolo gabe tano !

Tuhan   Debata   na   manompa   ibana   dohot  Tuhan   Jesus  Kristus  na manghopkop  ibana,  dohot Tondi  Parbadia  na mamio  Parlagutan  i tu hangoluan na so mantak, i ma na manjagahon ibana lopus ro ari na parpudi, ari hangongot na godang i. Amen (Dilehen kesempatan mandabu tano tu keluarga).

       Paragenda :

Rap mandok ma hita tangiang na niajarkon ni Tuhan Jesus ! Ale Amanami na di banua ginjang, pinorbadia ma GoarMu. Ro ma harajaanMu. Tulus ma rohaMu di banua ginjang songon i muse di tano on. Lehen ma di hami panganonnami ganop ari sadari on. Sesa ma dosanami songon hami manyesa dosa ni dongannami na mardosa di hami. Ulang pamasuk hami tu bagasan pandugaan, tapi palua ma hami sian pangago i.

Dibaen Ho do nampuna harajaan, dohot hagogoan dohot hasangapan salolot ni lolotna. Amen!

6.        PASU-PASU:

Didongani asi ni roha ni Tuhan Jesus Kristus dohot holong ni roha ni Debata Ama, dohot pardonganan ni Tondi Parbadia ma hita on sudena ! Amen

7.        E N D E:                                                            (Sapanjang manutup kubur i)

rasenaha'18