TATA IBADAH MINGGU / PESTA GKPA MODEL"C "

TATA IBADAH MINGGU / PESTA GKPA

MODEL"C "

RESPONSORIA (MARSIALUSAN)

1.         ENDE

2.         VOTUM :                                                            (P = Paragenda        R = Ruas )

P       :        Dibagasan goar ni Debata : Ama dohot AnakNa Tuhan Jesus Kristus, dohot Tondi Parbadia, na manompa langit dohot tano on.

P+R   :        Amen!

P       :        Madung  dipabotohon  Ibana tu  ho  ale jolma,  sanga  aha  na denggan, jana sanga aha na niparhagiot ni Jahowa sian ho.

R       :        Ima na patuluskon uhumNa sajo dohot holong ni roha di habasaon

P       :        Jop ma rohamu mida Jahowa, jadi lehenonNia ma di ho na nipangido ni rohamu.

R       :        Pasahat ma tu Jahowa pangidoanmu, jana haposi Ibana, jadi patupaonNia ma i.

P       :        Pasonang ma rohamu mida Jahowa, jana painte ma Ibana.

R       :        Jana haposi ma Jahowa, jana baen ma na denggan.

P       :        Angke dihaholongi Jahowa do uhum na tigor.

R       :        Jana nada ditinggalkon la angka hasianNa.

P       :        Ngot ma ho ale tondingku, ngot ma ho ale parhinaloan.

R       :        Tarsunggul ma au buha siang ah, pujionku ma Ho di tonga-tonga ni angka bangso, ale Tuhan.

P       :        Endehononku ma Ho di tonga-tonga ni angka marga

                   Haleluya............                                                                       

P+R  :        (Rap mangedehon) : Haleluya, Haleluya, Haleluya

P       :        Martangiang ma hita !

                   Ale Tuhan Debata Amanami parasi roha godang, tarimakasi ma rohanami tu Ho.

R       :        Sai lehen ma tondiMu tu rohanami, anso margogo hami jana anso hami jalahi arta na di banua ginjang i.

P       :        Pargogoi ma hami manaluhon sude na giot mangambati hami ro tu harajaanMu.

R       :        Sai lehen ma tu hami roha na togu, na badia, pikiran na torang dohot roha na ringgas patuluskon karejo na denggan i.

P       :        Sai lehen ma dame tu hami anso sonang hami maradophon sude angka musunami.

R       :        Sai  lehen   ma   toruk   ni  roha   di  hami  be   dohot  roha   na marsihaholongan.

P       :        Sai tambai ma haporsayaan, dohot arop ni roha di hami.

R       :        Anso monang hami lopus tu ujungna.

P       :        Jana sai jagahon jana pargogoi ma hami markitehite Tuhan Jesus Kristus Sipalua hami.

P+R   :        A m e n !                                                                                (Rap juguk ma hita)

3.    ENDE

4.                    TON A

P       :        Tapaihut-ihut ma jolo songon dia pandok ni Tuhan Jesus taringot tu Tona i.

         R       :        Angkon dihaholongi ho Tuhan Debatamu, sian sude ateatemu, sian sude tondimu, dohot sian sude rohamu.

         R       :        Tapi sobok dohot i do na paduahon i:

         P       :        Angkon dihaholongi ho do donganmu songon dirimu.

         P+R            :        Ale Tuhan, sai pargogoi ma hami patuluskon hataMi, Amen.

5.                    ENDE :

6.                    TANGIANG MANGOKU DOSA :

P       :        Rap rim ma hita jongjong ! Tatopoti ma dosanta di jolo ni Debata, martangiang ma hita !

                   Ale Debata Amanami parasi roha na sumurung. Ditomu-tomu Ho do  halak   na  ringgas  rohana   mambaen   hatigoran,   angka  na paingotingot Ho di angka dalanna.                                                                     

R       :        Ligi ma madung tarnmas situtu do Ho ale Jahowa,  hara ni dosanami, jana madung lolot hami di bagasan dosa i maradophon Ho.

P       :        Jana doskon halak na ramun do hami sudena, jana songon abit na hona mudar do sude hatigorannami.

R       :        Jana mago do hami hara ni hajahatonnami, songon bulung-bulung na nihabangkon ni alogo.

P       :        Nada adong umpe sahalak na mamio goarMu, bope na jongjong marsitiopan tu Ho.

R       :        Hara ni i, madung ditabunihon Ho bohiMu tu hami, jana maheu do ate-atenami hara ni hajahatonnami i.

P       :        Saonnari pe ale Jahowa, Ho do Amanami, tano do anggo hami, jana Ho do na manompa hami.

R       :        Jana jadi-jadian ni tanganMu do hami sudena, sai ulang ma hona rimasMu hami ale Jahowa, jana ulang ma paingotingot hajahaton dohot dosanami.

P       :        Ligi jana tatap ma hami, dibaen bangsoMu do hami ale Debata, tangihon    ma    tangiangnami,    jana    paeleng    ma    pinggolMu manangihon pio-pionami. Amen!

P       :             Tabege ma baga-baga ni Debata taringot tu hasesaan ni dosanta ! Parasi roha jana pardenggan basa do Tuhan Debata, lambat tarrimas jana parasi roha godang.

R       :        Nada  dibaen  tu  hita  hombar tu  angka  dosanta,  jana  nada dibaloskon tu hita hombar tu angka hajahatonta.

P       :        Songon asi ni roha ni sada ama mida angka dakdanakna do asi ni roha ni Debata di angka na manghabiari Ibana. Hasangapan ma di Debata na di ginjang !

P+R            :        A m e n !                                                                                                                   (Juguk ma hita)

7.                    MARENDE

8.         EPISTEL   :                                             (Mambasa turpuk na diaturhon di Almanak jana dipaujung)

P       :        Martua ma angka na male dohot na manguas mida hatigoran i.

         P+R            :        Amen I

9.                    ENDE

10.      MANGOKU HAPORSAYAAN :

P       :        Rap rim ma hita jongjong ! Taoku ma aha na dung tahaporsayai i. Songon dia do haporsayaanta di Debata ?

R       :             Au porsaya di Debata, Ama Na Sun Markuaso, na manompa langit dohot tano on.

P       :        Songon dia ma haporsayaanta di Jesus Kristus ?

R       :        Au porsaya di Jesus Kristus, Anak ni Debata Jahowa na sasada i Tuhanta, na nitubuhon ni Tone//' Parbadia, na nianakkon ni bujing-bujing si Maria, na manaon parsahitan taran Pontius Si latus, diparsilangkon, mate, nitanom, manuat tu banua torn, ngot sian halak na mate di ari patoluhon, manaek tu banua ginjang, juguk di siamun ni Debata, Ama Na Sun Markuaso. Mulak la muse sian i, manguhumi halak na mangolu dohot na mate.

P       :        Songon dia muse do haporsayaanta di Tondi Porbadia?

R       :        Au porsaya di Tondi Porbadia, sada pariagutan ni halak Kristen na badia, pardonganan ni halak Kristen na badia, hasesaan ni dosa, hangongot ni pamatang, dohot hangoluan na so mantak. Amen.

11.      TINGTING/ TANGIANG PANGONDIANON :

12.      PALAGUT HAUL :                                                                                                                                (dung jongjong na palagut haul di jolo ni langgatan )

         Tabege ma jolo hata ni Debata na gabe ojahan di hita laho papungu haulta i ma
na tarsurat di..............

1.       Masmur 50 :14

          Haul haluaan ma haulkon tu Au, Debata na gumincat, patulus ma janjiMu tu Au ! Amen.

2.       Masmur 50 : 23 a

          Sanga ise na mandok tarimakasi baen haulna, i do na pasangapkon Au ! Amen.

3.       Poda11:24

          Adong do halak na burju mangalehen tapi mur martamba kayo, adong do na sun hematna mur pogos ! Amen.

4.       II Korintus 9 : 7

          Angkon marguru tu na nionjar ni rohana be ma mangalehen, ulang pola hara ni na alang-alangan sanga hara ni na tarpaksa angke dihaholongi Debata do sanga ise na mangalehen sian jop ni roha ! Amen.

5.       II Korintus 9 : 6

          Timbang hamu ma jolo ! Anggo halak na manyuan same saotik, otik muse do suhani i buatonna. Tapi anggo halak na manyuan bahat same, laing bahat ma muse buatonna suha sian i! Amen

          Antong, ta palagut ma haulta na I - II.

          Marende ma hita...........!

13.      ENDE  :                                                                                        (Haul I-II)

14.      JAMITA

a.       Tangiang laho Jamita

b.       Mamasa turpuk Jamita

c.       Ende manyambut Jamita No. 34 : 3

          Pasu-pasu ma jamita, di bagasan rohangki

          Asa tongtong ma tarida, laing mangolu hataMi

          Di parange di hatangku, ro di pangalahongki

          Sai tarida ma parbatu, ni hataMu di au on.

              d.           Marjamita

              e.       Ende mangauhon Jamita No. 312 : 5

                   Amin, amin, amin, na tutu do i

                   Sai marhangoluan na porsaya i

                   Sai marhangoluan na porsaya i

              f.        Tangiang manutup Jamita.

15.              ENDE :                                                                                                                       (Haul III)

16.              TANGIANG HAUL :                                                                     Rap rim ma hita jongjong !

P       :        Tapasahat ma haulta on tu Debata anso dipasu-pasu, martangiang ma hita.

                   Ale Tuhan Debata, Amanami parasi roha na sumurung, nampuna sude ngolunami. Tarimakasi godang ma hami pasahat tu adopanMu, dibaen madung dijagahon, jana dipasu-pasu Ho ngolunami. Lalu tu sadari on tongtong do hami dapotan asi ni rohaMu, dilehen Ho do di hami hahorasan, sipanganon, dohot sude na porlu di parngoluonnami. Jana dilehen Ho do hataMu na manorangi ngolunami.

                   Songon tanda hatarimakasionnami, hami pasahat do tu joloMu sian angka na nilehenMu tu hami gabe haulnami tu Ho. Tangkas do ditanda Ho hadirionnami dohot parrohaonnami. Jagit ma i jana pasu-pasu, gabe hamuliaon di goarMu, na marguna baen pararatkon harajaanMu di portibi on. Sai mur tambai ma pasu-pasuMu di hami, togu-togu ma hami  anso tongtong hami haulkon dirinami dohot na adong di hami markitehite roha na ias tu harajaanMu. Ajari ma hami anso tongtong hami puji jana hami pasangap Ho di ngolunami dohot pambaenannami. Ro hami martangiang tu adopanMu di bagasan goar ni AnakMu Jesus
Kristus Tuhannami. Amen !

R       :        (Mangendehon ):

                             "Di Ho hulehen ma rohangku, tondingku pe di Ho muse.

                             Harani Ho adong gogongku, sai pargunahon ma sude.

                             Tuhanku Ho dohot Rajangku, laing Ho na patut oloanku".

17.      TANGIANG PANUTUP :

P       :        Ale Amanami na di banua ginjang !

         R       :        Sai tangihon ma hami ale Debata muda hami pio Ho amang.

         P       :        Pinarbadia ma goarMu

         R       :        Palapang ma rohanami muda dumpang hagogotan, asi ma rohaMu di hami, jana tangihon ma tongtong tangiangnami.

         P       :         Ro ma harajaanMu.

         R       :        Dibaen nada panganon bagi inumon anggo harajaan ni Debata, tapi hatigoran dohot hasonangan dohot jop ni roha do di bagasan Tondi Parbadia.

         P       :        Tulus ma rohaMu songon di banua ginjang, songon i muse di tano on.

         R       :        Ale Debata Amanami, urupi ma hami, anso di sude ngolunami tardok hami, " RohaMu ma na tulus ".

         P       :        Lehen ma di hami panganonnami ganop an sadari on.

         R       :        Porsaya  do  hami bahaso pasingkopkonMu  do  hapohuannami siganop ah lobi sian na hami pohuhon.

         P       :        Sesa ma dosanami, songon hami manyesa dosa ni dongannami na mardosa di hami.

         R       :        Muda diuhumi Ho do hami ale  Tuhan hombar tu dosa dohot hasalaannami, na angkon mate do hami. Asi ma rohaMu di hami halak pardosa on.

         P       :        Ulang pamasuk hami tu bagasan pandugaan, tapi palua ma hami sian pangago i.

         R       :        Ale Debata Amanami, sai lehen ma di hami gogo laho mangalo sude angka pandugaan, muda Ro hasusaan, paingot ma hami, na tongtong do Ho rap dohot hami.

         P+R   :        (Rap mangendehon):

                            Dibaen   Ho   do   nampuna   harajaan,  

                            dohot   hagogoan,   dohot

                            hasangapan, salolot ni lolotna. Amen !

18.      PASU-PASU    :

         P       :        Tajagit ma pasu-pasu sian Tuhan Debata !

                     Dipasu-pasu jana dijagahon Tuhan Debata ma ho / hita Disondangkon Tuhan Debata ma bohiNa tu ho / hita, jana asi ma rohaNa mida ho / hita Diadophon Tuhan Debata ma bohiNa tu ho / hita, jana dipasaor ma dameNa tu tondimu / tondinta.

         P+R :        (Rap mangendehon) Amen, Amen, Amen !

19.      MARENDE   No. 140 : 1 -.......            (Huhut manjalang Parhobas na martugas/melayani)